निर्वासित जूम्ह जि छम्ह कचि मचा

१.
तामा खुसिया पारी थौं छुं लुमन्ति मदु
अन केवल पुलां-पालांगु आपा – इपा जक दु
जि उलि हे पुलां
गुलि अनयागु आपात।
व छगु दिप ख:
गन निर्वासित कचि मचातय‍्गु
जीवन-आस्था अन्त्य जुल।
जि उलि हे पुलां
गुलि कचि मचातय‍्गु निर्वासित बाखं।
ख: जि नं छम्ह कचि मचा
थ्व बुद्ध जन्म स्थलय्
थ्व काजि भीम मल्लया जन्म देशय्
मांपिसं मिखां ख्वबि धा हाय‍्का
छपा ल्हातं नसा बजि ब्यकुं च्याना
मेगु ल्हातं कचि मचा बुया
थन निर्वासित जूगु ख:
छम्ह सुं जुजुयागु उदारताय्।
उकिं थन सिमा आ तक नं
थ:गु ह: लाया —
“थ्व नं छंगु दे ख:
सुनानं छंत निर्वासित याय् फइमखु” धका
युगयागु संदेश
कचि मस्तय‍्त न्यंका च्वंगु दु।
थौं नं गुँ गुँ पतिकं
सिमा-सिमा पतिकं
चायागु कण-कण पतिकं,
खुसियागु वेग व लहर पतिकं
कचि मस्त बुया
मिखां ख्वबि घा हाय‍्का
थ:गु देसय् लिफ, लिफ स्वस्वं
मांपिसं हागु म्ये थ्वयाच्वंगु दु।

२.
जि नं व हे मांया
                      छम्ह कचि मचा ख:
व हे कचि मस्तय‍्गु छगु रूप ख:
गुम्हसिया नुगलय् भय‍्भय् बिया
क्वागु हि दासि वइ च्वंगु दु।
जिगु ख्वा खना
जिगु व्यथा व प्रतिशोधं जागु स: न्यना
छपुच मनुखं धागु दु —
“झीगु सुरक्षाया लागि
थ्व मुल्याम्ह कचि मचायागु
याकन अन्त्य याय् मागु दु !

 

 

३.
सुं  पसल्यां जिमि मांयात दाइ च्वन
वया जहानपिंस हिस्याना च्वन
गुलिस्यां दागु खं पां मखंछु याना च्वन
अय् नेपामि पासापिं ,
धात्थें छिमिगु नुग नेपामि जुउ ला ?
जिगु नुगलय् बिद्रोह हा कया च्वंगु दु
उकिं जित थौं
स्वइगु उपदेश मागु मदु।
वासा, छिपिं छको जिगु न्ह्योने दं
छम्हेस्यां मेम्हेसित थि स्वय्
झीसं थन छु याय् फइ धका
झी थथे दनेबले
स्वैगु नुगलय भ्वखाय् ब्व:सा ब्वय‍्केब्यु
उकिं झीत छु याय् फइ मखु।
झी, झी जुल कि
सुनानं छुं याय् फइमखु।

४.
मांपिसं ख्वबिधा: नाप हागु म्ये
कचि मस्तय‍्गु ख्व:स:
आ तक जिगु न्हाय‍्पनय् थ्वइ च्वंगु दु।
जि ला थुने धुंकूम्ह
कचि मचायागु छगु ख्व:स: जक ख: ।
जि व ज्याथ ख:
गुम्हेसित यखाना स्यात।
जि व न:लिम्ह ल्याय‍्म्ह ख:
गुम्हेसित गोलिं शिकार यात।
जि छम्ह व कचि मचा ख:
गुम्हेसित निर्वासित याना छ्वत।
जिगु अंग – अंग
थ्व खँ गुबलें लोमंके फइमखु।
जिगु सासलय् कचि मस्तय‍्गु आह व पिडात
गुबलें मथ्वसे च्वने फइमखु।
जि उलि हे पुलां
गुलि निर्वासित कचि मस्तय‍्गु बाखं।

(न्हापा पिदंगु: सितु ने.सं. १०९३)