सिद्धिदास

महाकवि सिद्धिदास महाजु

(ने सं ९८७ यंलागाः २ - ने सं १०५० कछलागाः १३ )

झीगु नुगलय् सिद्धिदास ज: जुया: अझ खैच्वन 
जाति क्यब नस्वाक्क अझ नं वैगु सृजना ह्वयाच्वन। 

ख्युं जलय् हे थ:त च्याका: 
लूम्ह ख: व बिहाँचुलि 
काब्य-तुफिचा कंत चीका:
न्ह्या:म्ह ख: व महाकवि।

‘भासा म्वा:सा जाति म्वाइ’ हिहिलं वं धैच्वन
झीगु नुगलय् सिद्धिदास ज: जुया: अझ खैच्वन। 

झीगु नेवा: राष्ट्र भाय्या 
ख: व धिसिमिसि लागु थां 
झीथाय् झी दतले तनी मखु 
झीगु नुगलय् वैगु नां। 

वैगु आत्मा झीगु भाय् ख:, भाय् अझं तर ख्वैच्वन 
झीगु नुगलय् सिद्धिदास ज: जुया: अझ खैच्वन। 

वैगु आत्मा ख्वय्क्य बीमखु 
झी न्ह्यलं चाय्का: दने 
क्रान्तिया मूस्या: ज्वना: झी 
सिद्धिदास जुया क्यने। 

झीगु लागा न्यंक बुलुहुं थौं थ्व हे स: थ्वैच्वन 
झीगु नुगलय् सिद्धिदास ज: जुया: अझ खैच्वन।

(नेपालभाषा दंपौ “पलिस्था” ने सं ११३६ खे  पिदंगु )