१. नेपालमण्डल
झीगु खः नेपालमण्डल, झीगु हे ज्वीमाः सदां
झीगु धाय्गु छुं दु खःसा, खः थ्व हे मण्डल दु न्हां
थन दु न्यंक यैपु गांपाः, नगर दु गनं न्ह्यैपुगु
तःमि झीपिं थःगु भाषां, थःगु हे संस्कृति, कलां
घन्य झी पुर्खा गुम्हेस्यां, देय् थ्व नेपाः दय्कल
झीसनं हाय्काः हिचःति वा थुकी तय्वा लसां
नत थजाः दै नत क्वजाः हे, तःमि दै नत चीमि हे
फुक्क नेवाः छप्प ज्वीवं झलल ल्वी नेपाल न्हां
२. जिगु थाय्
जिगु यःगु थ्व थाय्, जिगु थःगु थ्व थाय्
जिगु हे मतिनां जक प्याःगु थ्व थाय्
गलि न्ह्यैपु थ्व थाय्, गुलि यैपु थ्व थाय्
मिखा चायव स्वयम्भु खनीगु थ्व थाय्
थन ब्वःगु फसय् जक स्वै च्वनेमाः
जिमि राजमती लुया वैगु थ्व थाय्
थन च्वंगु थ्व चाय् नतुना स्व छक्वः
थन झीगु हे दुःख नस्वाःगु थ्व थाय्
३. खुसि
बाः वनाच्वंगु खुसि, बाः वनाच्वंगु ई
खुसिया धालय, ईया धालय्, खने दैच्वन निम्ह झी
न म्हिगःया लुमन्ति, न कन्हेया च्यूताः
गुलि न्ह्यैपु थ्व झाः, दिनाच्वन ईया धाः
थ्व किचः जक खः कि, खः धात्थेँ निम्ह झी
गन दु खुसि, गन दु ग्व लः, गन दु थ्व झाः, गन ई ?
४. मतिना
नुगलय् गबलय् लुया वै मतिना
अबलय् खने दै न्ह्यैपुस्य दुनियाँ
सर्गः स्वःसां यैपुस्य यैपुस्य
धरती झःझः न्ह्ैयपुस्य न्ह्ैयपुस्य
फय्तक हे नं रंगं खःथें
न्ह्याथाय् स्वःसां कपनं खःथें
रिमिझिमि रिमिझिमि झलमल झलमल
मतिनाय् खने दै यैपुस्य दुनियाँ
सपना खः ला, विपना खः ला
न्ह्यः नं ज्वःथें, ज्वः नं न्ह्यःथें
ख्युंथाय् स्वःसां न्हसलां खःथें
ख्वबि तिकि नंसां म्वति ज्वैवःथें
पीरतकं नं खीर सवाः वै
मतिनाय् लुया वै न्ह्यैपुस्य दुनियाँ