प्रत्येक सिमाया ह:
कुतुं वया जित धा व:गु दु
थन फय् व:गु दु।
यद्यपि बुझ पचे पचे यायेत स्वगु दु
द्याग्रिगु सिमाया दाँलं – इ इ पनानं।
प्रत्येक कुंका च्वंपि
पुखूया ल:या लहर लहरं
जित नेंक व:गु दु —
थ्व बँय् थ्व लँय् पला छिना
थन फय् व:गु दु ।
यद्यपि बुझ पचे यागु दु
पेखेरं ल्वँह:या त्वाथ:तयसं — लखं पेंका नं।
प्रत्येक स्वां, सीतं
जित कं व:गु दु —
कालकुल कालकुल स:लं
ब्याक्क जि थाय, नसंचा व:गु दु।
यद्यपि बुझ पचे यागु दु – नमवासें, नमवासें
थ्व अंग:, पखा:, व पर्बं।
जित मछिंगु जिगु क्वाथाया अंग !
ज: ला मि ख: ह्याँगु दुसु,
जिगु सुरक्षाया नामं
नामसारी याना काया त:पिं
ज: फय् व जिगु सर्ग:या भोकबन्दकय्
ग:लाना च्वपिं धुसि सिँया खापात !
जिं ला स्यू…
फय्ला लोक खः, सः खः।
सः खः —
व ला अन झं प्रतिध्वनित जुया थ्वै
गन वैत पना बिइ।
सफू – गाजलं दागु चा ( ने. सं. १०८६ )