पञ्जः त्वःता झंगः ब्वयावनी छन्हु।
म्हं नौ जुया दिपय् छ्वयावनी छन्हु।
संगु बाःगु चाधम्पं सुलुंहुं मचायेका,
आयु सुचुसे च्वंका ज्वयावनी छन्हु।
मनं ज्वना च्वनीगु अहंकारया गथः
हेग्वाःहे जुया मिंइ क्वयावनी छन्हु।
म्वाना च्वंतले सदांहे स्वार्थय् लाना,
दुःख व कष्ट ननं ख्वयावनी छन्हु।
छलकपट ईर्ष्या द्वेषय् तःतः क्यना,
सुका ग्वारा स्वःथें स्वयावनी छन्हु।
तेज कृष्ण श्रेष्ठ, ठिमी