अजु चाल – मोतिशान्ति शाक्य

 

दिनुया मां , थ: अबु नापलायत सनिलय् थ: छेंय् वनेत्यंबलय् , गब्लें जिद्दी मयाइम्ह मांयागु खं बांलाक्क थुम्ह दिनु जिद्दी याना मांम्हेसिया ल्यू ल्यू वं हे वन । अब्ले लाक्क सतकय् काराक्क स: वल । निम्हेसियां लिफ: स्वल । छम्ह मिसा ला प्यत: जागु छेंयया कसिंइ कुतुं वया लाछीइ बज्रय् जुगु खनी । थ्व: दृष्य निम्हेसिननं बांलाक्क खन । गबायत तक उमिसं छुं न्वं वाय् मफू । छ्यनं ही बाहा वंगु खंका दिनुया मां हाल –

“ हे भगवान थ्व: छु जुगु ! मन्त थें च्वं “

मांया पर्सि च्व: ज्वना थरथर खाका च्वंम्ह दिनुयात मांम्ह न्वात – “ वयेमते धायक वल , खन मखुला “

मांम्ह थुलि जक छु धाल , दिनुया नुगलय् त्रास नाप नापं पश्चाताप नं पिज्वल । अले ह्वाँय् ह्वाँय् ख्वया मेगु लंपु जुया छेंय् लिहां वल ।

छेंय् थ्यंका , सकल छेंय् ज: पिनिगु न्ह्योने जिं याना छम्ह मिसा कसिं कुतुंवल धका दिनु हिहिललं ख्वल । थ्व: मचां छु धागु धका थुइके मफुत । अब्ले लाक्क मांम्हं , थ: छेंय् हे मवंसे लिहां वया छें ज: पिन्त जुगु घटनाया बारे बृतान्त कने क्वचाय् मलायवं दिनु मांम्हेसित  घयपुना “ जिं मांयागु खं मन्यनागुलीं व मिसा कसींइ कुतुं वगु ख: जि मवसा कुतुं वैमखुगु “ धका झन ख्वल । मचाया धापू न्येना सकलें अजु चाल । अले सकल परिवारं दिनुयात हेयकल । सुयागु नं व घटनाय् दोष मदु धका सम्झेयात । व ला छता: दुर्घटना जक ख: धका दिनुया क्यातुगु बाल मनोभावयात सान्त्वना बिइगु कुत: यात । उकुन्हु दिनु हिकुहिकु लंक ख्वख्वं छुं हे मनसे द्यन । कन्हे कुन्हु सुथय् न्ह्यलं चायवं दिनुया मिखाय् व हे दृष्य प्यपुंवल । मिसा बज्रे जुगु स: जक न्हायपनय् दिना च्वन । अले वाथाक्क दना मिसा कुतुं वंगु थासय् वन । मिसा ला म्वात तर होसय् मवनी । व मिसा अस्पतालय तिनी धका वं सिइकल । उकुन्हु नं दिनु न्हिच्छीं भुग्लुं । सुनापं नं न्व मवा: । बांलाक नसा नं मन । ख्वा: ख्यूं । अथे जुगुलिं मांम्हेसिया मचा सातु जकं वनला धका किसली छह: भागी याका पलिइ तया बिल । मांम्ह , दिनुयात कसिक्क घयपुना मनोवल बल्लाकेगु कुत: यात । दिनुया दाजुं नं थ: केहेंयात हायेका न्हिकेत यक्व कुत: यात तर न्हिइके मफू ।

दिं बिनावं वन । कसिं कुतुंवम्ह मिसाया हालचाल सिइकेत दिनु न्हिया न्हिथं व हे कुतुं वगु थासय् दुगु किराना पसलय् पस: वनेगु यात , छम्ह नियमित गाहाकी थें । यक्व लिपा: , व मिसा होसय् वल धागु न्येनां दिनु लयताल । अनंलि व मिसा डिस्चार्ज जुगु सिइवं गुलि न्ह्यो निसें चितासु मदयका च्वंम्ह दिनुं म्ह हे याउंस्से च्वंगु अनुभुती यात ।

न्यादँ लिपा , छन्हु !

दिनुया अबुं छता: बांमलागु सुचं ज्वना वल ।

“ उब्ले कसिं कुतुं वम्ह मिसा म्हिग: निमोनिया जुया मन्त हं “

दिनु वाताहं जुल । अले न्हापाथें दिनुया नुग: भाराभारा ममीं । म्ह मखा: । मिखां ख्वबी नं महा: ।

तर दिनु अजु धासा अबस्य चाल ।

No Comment

Leave a Reply

Your email address will not be published. Required fields are marked *

न्हुगु पोस्ट

रचना