साधिर छम्ह च्वमी ।
– सायद मछाम्ह प्रेमी
– अन्तरमुखी स्वभावयाम्ह
– एकोहोरो
– जिद्दी
– भावुक
अमृता नं छम्ह च्वमी ।
– सायद बिन्दास प्रेमी
– निश्चल नुग दुम्ह
– खुल्ला मन
– चञ्चलम्ह
अमृता साधिर धालकी उइं जुइ । अमृता साधिरया दिवानी । थथे खया नं अमृताया दुर्भाग्य ! साधिरयात थम्ह याय् मफू ।
साधिर तक मछी अमृताया छेंय् थ्यनी । चुरोट च्याकी । च्या त्वनी । अमृतां साधिरं त्वना एस्ट्रेय् त्वता थकिगु चुरोटया टुक्रा त लिकाइ अले थगु म्हुतुसीइ दिकी । अमृतां साधिरं त्वंगु च्याया चिपगु गिलास थगु म्हुतुसीइ दिकी । एकोहोरो मखु तर अपूर्णगु प्रेमया दसु कथं अमृतां थगु आत्म कथा दुने थथे हे किइ । जितः ताइ रोमियो व जुलियटं छु प्रेम यात ? व सिबें अप्व अमृतां साधिरयात यागु दु । मुना व मदनया प्रेम सिबें जितः साधिर व अमृताया प्रेमय् गुलिखे गुणा गहिराइ दुगु ताइ । परिस्थिती प्रतिकूल जुजुं क्वचाइगु प्रेम दुखान्त खया नं दुग्यनि । निश्कपट जुया बिइ । निस्वार्थ जुया बिइ । जितः अमृता व साधिरया प्रेम नं अथे हे ताइ ।
मुमताजया नितिं ताजमहल दयकुम्ह शाहजहांया प्रेम बकवास ता , जितः । छायकी , छम्ह साधारण मनूया बाखं थौं जिं च्वया च्वना । गुम्हेसिगु बाखं ब्वनकी , सम्भवत छम्ह पाठकया नातां छन्त नं प्रेमया ब्याग्लं रुप महसुस जुइफू ।
थौं मन्ह्यः मन्ह्यः जिगु बाखनय् “व” दुहां वै । छपू रोमान्टीक बाखं च्वयमागु दु । गुगु बाखनय् “व” दया बिइ ।
– सुथः न्हापनं “व” दनी
– सुर्द्य लुइ न्ह्यवः “व” लुइ
– सुर्द्यया जः खय् न्ह्यः “वं” थः यज्यूया राप काइ
– उत्तर पाखेया हिमालया च्वापूइ “वं” थः यज्यू खंकि
– थगु कोठाया अंग अंगले थः यज्यू खंकी
– मिखाः तिसिना थः यज्यू महसुस याइ ,
फसय् / शुन्यताय् / न्हाय्कनय् / कोठाय् तिकाः तगु हिरोइनतगु तस्विरय्
वयागु दिनचर्या थुकथं हे न्ह्याइ । घण्टौं बाथरुमय् च्वनी । कपाः ज्वनी । थः यज्यू लुमंका बाथरुमय् ध्यानय् लीन जुइ । अले पिहां वनी । थ्यनी ,
– गुम्बाय्
– चैत्यय्
– देगलय्
छेंय् पाखें पिहां वय् साथ हे वया म्हुतु वाला वाला सनी । मन्त्र उच्चारण जुइ –
” जेशीका , जेशीका , जेशीका , जेशीका ………… “
गुम्बाय् न्ह्योने च्वंम्ह बुद््वया न्ह्योने ओम मणि पद्मे हुं या सट्टा “वं” जेशिका जेशिका उच्चारण याइ । गणेद्यःया न्ह्योने नं अथे हे गथे –
” मंगलम …… तनोहरी “
वं वार वार लुमंकी ।
– चिकेन चिल्ली
– हट लेमन विथ हनी
– लस्सी
जेशिकां न्ह्योत्तु न्ह्यगु चिकेन चिल्ली नयगु वयागु रहर खः । जेशिकां पिचि पिचि फाइगु इ घुट्केगु वया रहर जुया बिइ । जेशिका म्हं मफया लासाय् ग्वारातुला च्वंगु सिइवं वयात जेशिका नाप लाय् हथाय् जुइ ताकी जेशिकाया फुक्क ल्वय् थगु शरीरय् साला काय् मास्ते वइ ।
रंगिन वया जिन्दगीइ , जेशिका
– धड्कन खः
– सास खः
– हिनुहुनुलिइ वहा वनिगु ही खः
वं जेशिकायात गुलि प्रेम यात सायद सुयात नं यागु खै मखु । जेशिकाया ल्हाः ज्वनीवलय् गनं वयात स्यातला धका ग्याकी । जेशिका खना थुली तं वै कि अयनं तं सुचुकेगु असफल कुतः याइ । जेशिका नाप लासां मज्यू नाप मलासां मज्यू । नाप लातकी छगु कथं हिइमिइ जन्म जुइ । नाप मलातकि नं उकथंया हे उकुसमुकुस जन्म जुइ । जेशिकां नं व फूक्क वया भावना थु । उंकेला जेशिकां न्ह्याब्लें छताः खं वारवार धाइ –
” जि डिस्टर्व खः छंगु जिन्दगीया “
न्ह्याग्गु थजु , मनुतयसं सक्कसिनं खंक ट्याटू किइ थ यज्यूया । तर वं थगु नुगलय् जेशिकाया ट्याटु किया तःगु दु । द्यंसा दंसा जेशिका वया म्हुतुइ । म्हगसय् नं जेशिका मात्र जेशिका । प्राय म्हगस यथार्थ थें जुया बिइ । उंके व म्हगस खना ग्याइ । अयनं वं धाइ –
” जितः म्हगसया बिश्वास मदु , जिं गब्लें म्हगस मखना ”
तर वयागु यक्व म्हगस पुवंगु दु वास्तविक जिन्दगीइ । गुलि म्हगस जेशिकाया साथ बिना अपूर्ण जुइ । व हे थुइका मनमनं धाइ –
” जि गुलि निरीह ! जिगु ल्हातीइ छुं मदु फुक्क वया ल्हातीइ जक “
जेशिकां नं वयात अति हे माया या । उंकेला वया नुगः खं थुइका धाइ –
” छंगु ल्हातीइ दुगु छुं नं खं जितः कं “
आखिर माया / प्रेम महसुस खः । आत्मा आत्माया स्वापूला खत । उंकेला नुग दुनेया फूक्क भावना त महसुस जुइ । उमिसं याना च्वन । धात्थें धायगु खसा प्रेम मात्र छताः महसुस खः गन पिडा यक्व सुखानुभुति कम जुया च्वनी ।
व पिहां वनी । गननं वनी वलय् जेशिका जवं वइला खवं वैला जुइ । न्ह्योनें वइला ल्युनें वैला जुइ । हरेक भिडय् वं जेशिका माली । अपरिचित मनूतयगु ख्वालय् जेशिका खंकी । अले नापलायत ब्वांय ब्वांय जुइ तर जेशिका मजुया बिइ । छन्हु वं जेशिकायात पल्सरय् खंकल । ब्यस्त लंपु जुजुं वंम्ह जेशिकां वयात मखं । वं भिड मखन । अस्तब्यस्त जनजिवन तकं वाः मचाल । सुलुलुलु मिखां ख्वबी हायकल । वास्तवय् व पल्सरय् जेशिका ख हे मखु अयनं वं जेशिका महसुस यात ।
जिं वया बाखं च्वया च्वना । वया प्रेम थुइका बाखं किया च्वना । गुलि घटनाक्रमत न्येनेवलय् जितः ताइ । थन पूर्व जन्म दु । पूर्वजन्मया आभाष जुइगु यक्व घटनाक्रम त लुया च्वन । गनं गब्लें जुइधुंकुगु घटना त थें जागु घटना लुया च्वनी । उंकेला वं तकोमछी धागु दु –
” जिं न्हापाया गल्ती हाकनं याय् मखु “
अयनं जुइ सायद जुल । छायकी छन्हु जेशिका वया न्ह्योने दं वल । अले धाल –
” परिस्थिती हे थुजोगु वल । जि थ: यस्सें वने त्यनागु मखु । सायद आ झीगु मिलन जुइ मखुत । तर , जिगु जिन्दगीइ छ न्ह्याब्लें याद जुया दं वया च्वनी । जिगु नुगलं छ गब्लें तनी मखु । स्वः , जिगु जिन्दगीइ छ जक मखु । मेपीं नं दु । जीं जि मां बाया मन तयमा । उंके थुइकी , जिं थः मां बाया मन तयगु लागी छंगु मन तछ्याना वना च्वना “
बाय् न्ह्यः दक्कसिवे लिपांगु इलय् जेशिकां थथे हे धया वन । जेशिकां वयात ब्यूगु दक्कसिवे लिपांगु प्रवचन थ्वः हे खत ।
जेशिकाया अन्तिम उपदेश न्येना वं जितः धाल –
” जिन्दगी स्वघौया संकिपा मखु । वास्तविक जिन्दगीइ आपलं संघर्ष यायमाली । आपलं यथार्थ कुबिइ माली । कुविया च्वना । मतिना गन मिलन जक खः धका ? दक्कसिवे तधंगु मतिना ला बियोगय् दै । बियोग लिपाया भोगाइ दुनेया हरेक उतार चढाव बास्तविक जिन्दगी अले मतिना जुया विइ । जेशिकां गुलि थाकुकः बिदा फ्वन जुइ । वया मन नं गुलि ख्वल जुइ बाय् त्यंवलय् । जितः थगु सिवें यक्व वया पिर दु । व गुगु कथं क्रुर जुया वंसा व प्रति जि सदैव ऋणी जुया च्वने । वया जिन्दगीइ वयफूगु हरेक पंग त जिं सामना याय् । तर वयात गब्लें नं छुं जुइके मखु । छायकी व जिगुम्ह उर्जा खः । प्रेरणा खः । जिं वयागु हरेक निर्णय स्विकार याय् हे मा छायकी जिगु अथाह प्रेम जिन्दगीभर जागृत याना तयमा । व प्रेम छु प्रेम गन जिं वया कुतःलय् साथ मबिइगु खसा । सम्भवतः पुनर्जन्मय् नं जिपीं थथे हे बाय् मालेफू । थ्वः हे जिमीगु प्रेम जुइ । तर जिगु प्रेम गब्ले नं तनी मखु न्हनि मखु । “
वया खं न्येना च्वनाम्ह जिगु मिखां ख्वबी धाः हाया च्वन । तर व धासा अतिकं सहज जुया थगु खं तया च्वन । अतिकं सरल रुपं थगु प्रेम वं ब्वया च्वन । अयनं ,
व न्ह्याक्वः हे सरल जुसां वयागु नाटकियता जिं थु । छायकी ,
– थन मनुत गुलि असहज जुइ उलि हे सरल जुइगु कुतः याइ
– थन मनुतयके गुलि बेदना पिलुह्वइ उलि हे न्हिलेगु स्वइ
