डा. आनन्द जोशीया गुपु हाइकु

अनुभूतिया चरमक्षणया कविता ख: – हाइकु।                                                — डा.आनन्द जोशी

लँ तब्या: यात
डोजरं छें छें थुन
जनता लँय्, बँय्।

झीके दुघा: दु
झीगु “म्हसिका” जालय्
अस्तित्व युद्ध।

लबु न्ह‍्यावन
फीं पने मफु लबु
थ:गु लँय् लबु।

प्यकालँय् देय्, जि
दुविधाय् जि, जीवन
हात्थ्या लँ ल्यय‍्त।

चा मुन तालय्
कय‍्कुना वन लागा
ह्युपा हे पंग:।

त्रसित मनू
कोरोना ब्याप्त लागाय्
अस्तित्व न्ह‍्यस।      

अनन्त यात्रा
गामं शहरय् दौड
जि गनं मदु।

जिं यन्त्र दयका
यन्त्रं ग्व:गु ब्यूहय् जि
सिर्जना हे गा: ।  


हाइकु ला ल:
ल्वहँ तछ‍्याना: न्ह‍्यात
आनन्द जोशी।